Ek Din Achanak Part 15

Idhar Jay apne pariwar ke saath aur baad mein apne kuch doston ke saath holi khelne ke baad thak haar kar khana khane ke baad jaldi so gaya aur Sonali ke saath holi mein bitaye huye lamhon ko yaad karte huye sapno ki duniya mein kho gaya.

Lekin Sonali ki to neend ud gayi thi. Halanki wo thak bhi gayi thi lekin neend aankhon se koso door thi. Shaam ko uske papa aaye aur Sonali se poocha “Beti holi kaisi rahi teri.”

 “Theek thi papa” Bahut bhari awaaz mein kaha Sonali ne.

Sonali ke papa ko kuch shaq huya to unhone poocha “Kyun kya hua. Tumhari tabiyat to theek hai na”

Itne mein Sonali ki mummy ne kaha “Suniye mujhe aapse jaroori baat karni hai.”

 “Kya baat hai. Batao”.

 “Yahan nahin kamre mein chalkar baat karte hain”

Uncle ne ek pal ke liye socha aur dekha Sonali ki aankhen nam hain to doosri taraf uski Sonali ki mummy mein ek udaasi, gussa, thandapan sab bhav ek saath aa-jaa rahe the. Uncle ko kuch akansha huyi ki kuch to gadbad jaroor hai.

Dono kamre mein gaye aur idhar Sonali ka dil joron se dhadhak raha tha. Ab kya hoga. Papa samjhenge ya nahin. Kahin …… hey bhagwan mein kya karun. Kahan jaun.

Dil dono ka dhadhak raha tha lekin dono ka dhadhakne ka karan alag alag tha. Jahan Jay ka dil romanch aur khushi se dhadhak raha tha wahin Sonali ka dil dar aur ghabrahat se dhadhak raha tha.

Uncle andar gaye aur poocha “Haan bolo kya baat hai. Tum kuch pareshan si lag rahi ho. Sonali ki bhi tabiyat thodi si kharab lag rahi hai. Baat kya hai batao mujhe”

Aunty ko kuch samajh nahin aa raha tha ki kaise wo baat shuru kare. Kaise apni beti ki kartoot inhe sunaye. Aunty ko inka gussa bhi pata tha. Pata nahin kya kar baithe.

Uncle ne aunty ko chup dekhkar kaha “Bolo bhi baat kya hai. Aaj holi ke shubh avsar par aisi kaun si jaroori baat aan padi jise tum akele mein hi batana chahti thi. Tum kuch dari dari si lag rahi ho. Jaldi batao mujhe bhi tension si hone lagi hai”. Ye kehte huye uncle ka swar thoda uncha tha.

Aunty thoda sa dar gayi uncle ka gussa dekh kar. Wo sochne lagi ki kya unhe batana theek hai. Lekin fir socha aaj holi ke din hi shanti se baat ho sakegi. Aaj inka mood bhi achha hai. Aaj nahin baat kari to fir ho bhi nahin payegi.

 “Suniye hamari beti jawan ho gayi hai. Ab humein uske haath peele kar dene chahiye”.

 “Tumse pehle bhi kayi baar is baare mein baat ho chuki hai. Wo padh rahi hai to use padhne do. Itni jaldi bhi kya hai. Jo gaon mein hota raha hai wo yahan sab nahin hota. Shadi ke liye abhi uski bahut umar padi hai.”

 “Wo padh rahi hoti to baat hi nahin karti is baare mein.” Aur itna kehkar Aunty chup ho gayi

 “Saaf saaf batao baat kya hai”

Tab aunty ne Raj ki kahi baat aur Sonali se huyi baat uncle to bata di. Jise sunkar uncle ko jhatka sa lag raha tha. Unhone kaha “agar ye sach hai to hamein koi thos kadam uthana padega. Main abhi usse baat karta hoon”

“Usse baat karne ki koi jarurat nahin. Aajkal ke bachhon par jab pyaar ka bhoot sawar ho jata hai tab wo kisi ki nahin sunte. Jaisa main keh rahi hun waisa hi kijiye aap. Shadi ho jayegi aur ye apne sasural chali jayegi tab sab pyaar vyaar ka nasha hawa ho jayega apne aap hi.”

“Shayad tum theek hi keh rahi ho. Main kal hi gaon mein apne bhai se baat karta hoon. Kyunki yahan shadi nahin kar sakte. Yahan karenge to Child Marriage ke jurm mein kahin wo ladka koi gadbad na kara de.”

 “Haan ye theek rahega. Aap subah bhai shahab se baat kijiye aur is mamle ko jitni jaldi ho sake daba dijiye. Nahin to hamari kitni badnaami ho sakti hai.”

Wo raat Jay aur Sonali ki jindagi mein kis kadar kahar dha dene wali thi iska andaaza dono ko nahin tha. Jahan Sonali sirf itna soch rahi thi ki papa sirf gussa honge aur use maarenge wahin Jay in sab baton se bekhabar sunhere sapno mein khoya huya tha.

Ab Jay ne pehle school mein holi kheli, fir apne parivar ke saath aur uske baad doston ke saath bhi holi khelne chala gaya. Ab holi mein wo itna bheeg gaya tha ki use thand lag gayi aur bukhar chad gaya. Subah Jay ki mummy use uthane aayi to dekha ki Jay ka badan tap raha hai to wo ghabra gayi aur Jay ke papa ko bataya. Jay ke papa use doctor ke paas le gaye aur doctor ne use dawai de thi. Bukhar ke karan Jay school bhi nahin ja saka. Ye galti ab dono ko jhelne padne wali thi. Halanki galti nahin keh sakte majboori hi sahi.

Idhar Sonali raat ki baat se pareshan hokar Jay ko batana chah rahi thi. Wo Subah park mein baithe baithe Jay ka intezar karti rahi lekin Jay ka no aana tha aaj aur na wo aaya. Time khatam ho gaya, prayer shuru ho gayi lekin wo wahan se nahin hili. Aakhir prayer bhi khatam ho gayi to sab bachhe apni apni class mein jaane lage. Sonali bhi bhari kadmo se apni class ki taraf badh gayi.

Class mein Sonali ka dil baitha ja raha tha. Wo ek baar Jay se baat karna chahti thi lekin Jay nadarad tha. Padhai mein uska man nahin lag raha th. Jaise taise chaar period khatam huye aur Sonali phir park ki taraf daudi jaise shayad isi pal ka intezar kar rahi thi kabse. Lekin wahan pahunch kar bhi use mayusi ka saamna karna pada. Kyunki Jay wahan nahin tha. Wo wahin ek ped ke pass baith gayi aur uski aankhon se aansu behne lage.

Achanak uski najar Jawed Bhai par padi to Sonali ne Jawed Bhai se Jay ke baare mein poochne ki sochi. Wo Jawed Bhai ke paas gayi aur Jay ke liye poocha. Jawed Bhai ne jab bataya ki Jay aaj school nahin aaya to Sonali ka man bahut udaas ho gaya kyunki aaj Saturday tha aur kal Sunday ki wajah se school band tha. To iska matlab wo ab Jay se Monday hi mil payegi. Lekin is beech na jaane kya se kya ho jaye. Jawed Bhai ne jab dekha ki Sonali bahut udaas hai to unhone Sonali se iska kaaran poocha.Lekin Sonali ne kaha “Nahin aisi koi baat nahin hai. Aaj Jay nahin aaya kahin wo beemar to nahin ho gaya.” Jawed Bhai ka dil jhoom utha ki Sonali aur Jay ke beech mein kitna pyaar hai ki unhen har pal ek dusre ki fikar rehti hai.

Jawed Bhai ne kaha “Mujhe to is baat ka pata nahin. Ho sakta hai kahin jaroori kaam se fans gaya ho. Monday ko to aa hi jayega. Kyun tension le rahi ho.” Tum jao apni class mein recess khatam hone wali hai. Sonali wapas apni class ki taraf chal di bina Jawed Bhai ko koi baat bataye. Ye Sonali ki sabse badi galti saabit hone wali thi.

Idhar Sonali ka papa ne apne gaanv mein phone milaya aur apne chote bhai se phone par baat karne lage. Pehle dono taraf se ek dusre ka haal chaal poocha gaya aur uske baad Sonali ke papa ne bataya ki kal wo gaanv mein aa rahe hain uske paas jaroori kaam se. Pehle to uncle ka bhai chaunka ki achanak kya kaam aa gaya lekin phir bhi usne bola “Bhaiya aapka ghar hai jab marzi aaiye. Waise koi khaas baat hai kya”.

 “Are nahin bhai aisi to koi baat nahin hai. Kai din ho gaye tum logon se mile huye to socha ki jaakar mil aayun.”

 “To bhaiya bhabhi aur Sonali bhi aa rahe hain kya saath mein.”

 “Nahin bhai Sonali ke exams aane wale hain isliye wo nahin aa sakti aur isi karan teri bhabhi bhi nahin aa rahi”

Uncle ke bhai ko kuch shaq ho gaya ki jaroor dal mein kuch kala hai. Bhaishab jaroor usse kuch chupa rahe hain. Khair jab wo kal aayenge tab pooch lunga.

Iske baad kuch idhar udhar ki baatein huyi aur phone rakh diya gaya. Uncle ne man hi man mein faisla kar liya Sonali ki shaadi ke liye aur kal hi jaakar sab final karne ki sochi.

Idhar dopahar ho gayi to Sonali apne ghar wapas aa gayi.Uske papa ghar par hi the. Usne apni najrein churani shuru kar di apne papa se kyunki unke saamne jaane se use dar lag raha tha lekin uncle ne bhi koi baat nahin ki. Sonali ka to dil hi nahin tha kuch khane peene ka. Apna tiffin bhi usne nahin khaya tha aur aakar lunch bhi nahin kiya. Ab jab dil dukhi ho to bhookh kahan lagti hai.

Idhar Jay dawai lene ke baad so gaya tha. Jab utha to bukhar utar gaya tha. Shaam ko Jawed Bhai usse milne aaye aur usse poocha “Jay tu school kyun nahin aaya tha”.

 “Jawed Bhai kal kuch jyada hi holi khel li thi usi ki wajah se bukhar ho gaya hai. Kyun kya baat ho gayi”

 “Kuch khaas nahin wo Sonali aaj bahut pareshan lag rahi thi. Baar baar tumhe pooch rahi thi. Achha jadu kar diya hai tumne us par.”

Bas isi tarah hansi majak karte rahe dono aur kuch samay baad Jawed Bhai wahan se chale gaye aur Jay bhi kuch kha pi kar aaram karne laga aur sochne laga ki Sonali mujhe kitna pyaar karti hai ki main ek din school nahin aaya to wo pareshan ho gayi aur paaglon ki tarah mujhe dhoodhti fir rahi hai. Kya koi kisi ko itna pyaar kar sakta hai. Main bahut khuskismat hoon ki mujh jaise ladke ko Sonali ka pyaar mila. Warna koi ladki mujhe chahti ye to maine sapne mein bhi nahin socha tha aur fir Sonali ke saath bitaye huye palon ko yaad karte hi Jay ke honton par muskaan fail gayi.

Kal ka din do premiyon ke liye kisi sunami se kam ka nahin hone wala tha.

Dono ki jindagi kya mod lene wali thi kise pata.

To be continued